Պլևրիտ. armeniamedicalcenter.am

Պլևրիտը թոքերի պլևրալ թաղանթների բորբոքումն է, որն առաջանում է պարիետալ և վիսցերալ թաղանթների հյուսվածքում և հաճախ բարդանում հեղուկի կուտակմամբ:

Պլևրիտն ավելի հաճախ հանդիպում է տղամարդկանց մոտ:

Տարբերում են չոր և էքսուդատիվ, ինֆեկցիոն և ոչ ինֆեկցիոն պլևրիտներ:

Չոր պլևրիտի հիմնական ախտանշաններն են.

• Ծակող ցավ կրծքավանդակում, որն ուժեղանում է հազի նոպայի ժամանակ
• Մակերեսային շնչառություն
• Պլևրայի շփման աղմուկ
• Սուբֆեբրիլ ջերմություն

Այս կլինիկան բնորոշ է չոր պլևրիտին: Հիվանդը ցավը նշում է կողերի տակ, որովայնում և որովայնային մկաններում: Կարող են արտահայտվել նաև սարսուռ, թուլություն, մեթիորիզմ, զկրտոց, գիշերային քրտինք:

Թարախային կամ էքսուդատիվ պլևրիտի ժամանակ սկզբում բութ ցավ է դիտվում, որն սկսվում է ամեն անգամ չոր հազից հետո:

Ախտահարված շրջանում սկսում է կուտակվել էքսուդատ, որի հետևանքով լինում են ծանրության զգացում կրծքավանդակի կողքերում, ուժեղ հևոց, գունատություն, միջկողային տարածությունների հարթեցում:

Այդ ամենին միանում են նաև.
 

• Թուլություն
• Բարձր ջերմություն
• Քրտնարտադրություն
• Ախորժակի բացակայություն

Երբեմն լինում է նաև այտուց, հատկապես դեմքի շրջանում, ձայնի կորուստ: Եթե էքսուդատն ինֆեկցվում է, այնտեղ թարախի կուտակում է սկսվում:

Պլևրիտի ծանր դեպքերում /քաղցկեղ և այլն/ կարող է դիտվել արյունային խորխ:

Եթե հիվանդության պատճառ է հանդիսացել կարմիր գայլախտը, ախտանշաններ կարող են լինել նաև հոդերի և երիկամների կողմից:

Պատճառները

Պլևրիտը հիմնականում ներքին օրգանների առաջնային հիվանդությունների բարդություն է:

Պատճառներ կարող են լինել.

• Տուբերկուլյոզը
• Կանդիդոզը
• Սիֆիլիսը
• Պնևմոկոկային և ստաֆիլոկոկային ինֆեկցիաները
• Որովայնային տիֆը
• Կրծքավանդակի վնասվածքները (տրավմաները)

Ոչ ինֆեկցիոն պլևրիտի պատճառներն են.

• Թոքերի ինֆարկտը
• Միոկարդի ինֆարկտը
• Չարորակ նորագոյացությունները, մետաստազները
• Ռևմատոիդ արթրիտը
• Ռևմատիզմը
• Լեյկոզը
• Պանկրեատիտը

Հնարավոր բարդությունները

Պլևրիտը պահանջում է անհապաղ և երկարատև բուժում: Եթե այն անուշադրության է մատնվում, բացառված չեն պլևրայում կպումների առաջացումը, պլևրալ թերթիկների հաստացումը, շնչառական անբավարարությունը:

Ախտորոշումը

Ախտորոշումն սկսվում է բժշկական զննումից. անգամ անզեն աչքով արդեն տեսանելի է լինում կրծքավանդակի անհամաչափությունը՝ ասիմետրիան, և ախտահարված կողմը շնչառությանը չի մասնակցում: Շնչառությունը թույլ է, գրեթե չի լսվում:

Անհրաժեշտ է իրականացնել նաև հետևյալ հետազոտությունները.

Կրծքավանդակի ռենտգեն, պլևրալ խոռոչի ՈՒՁՀ, կուտակված հեղուկի պունկցիա, բակտերիոլոգիական և ցիտոլոգիական հետազոտություն, արյան ընդհանուր հետազոտություն, բիոպսիա:

Բուժումը

Բուժման համար նախ պետք է ազդել այն առաջացնող պատճառի վրա և թեթևացնել հիվանդության ծանր ախտանշանները:
Պնևմոնիայի դեպքում նշանակվում են հակաբիոտիկներ, ռևմատիզմի դեպքում՝ ոչ ստերոիդ հակաբորբոքիչներ:

Ախտանշանները վերացնելու համար նշանակվում են.

• Անալգետիկներ
• Սիրտ-անոթային պատրաստուկներ (պրեպարատներ)
• Բուժական մարմնամարզություն
• Միզամուղներ
• Ֆիզիոթերապիա /հեղուկի հեռացումից հետո/

Եթե արդեն կա կուտակված հեղուկ, այն հեռացվում է պունկցիայի օգնությամբ և դրենավորմամբ: Եթե ախտորոշման ժամանակ թարախ է հայտնաբերվում, ապա պլևրալ խոռոչը լրացուցիչ լվացվում է անտիսեպտիկներով (հականեխիչ):

Ծանր դեպքերում հնարավոր չի լինում խուսափել վիրահատական միջամտությունից:

Կանխարգելման համար անհրաժեշտ է.

• Հրաժարվել ծանր և վտանգավոր աշխատանքից
• Խուսափել մրսելուց, մրսածական հիվանդություններից
• Օգտագործել վիտամիններով հարուստ սնունդ
• Հրաժարվել ծխելուց

 
Առողջ ապրելակերպը, օրգանիզմի կոփումը նպաստում են խուսափելու պլևրիտի արտահայտումից:

Հարցեր, պատասխաններ, մեկնաբանություններ